3Jo | AAK | STEP |

Payí̵ Jono eaŋí̵ yoparí̵narɨnɨ.

Payí̵ rɨna yoparí̵ Jono eaŋí̵narɨnɨ. O xewanɨŋoyá yoí̵ mɨrɨní̵ Jisasoyá sɨyikí̵ imónɨgí̵áyo wipeŋweaŋáonɨyɨ nɨrɨnɨrɨ ŋwɨrárɨŋɨnigɨnɨ. Ámá Jono nurɨrɨ payí̵ eaŋo xegí̵ yoí̵ Gaiasorɨnɨ. Jisaso rɨxa aŋí̵namɨ nɨpeyimáná xwiogwí̵ aga obaxí̵ nɨpwe'máná eŋáná Jono nɨŋweaŋɨsáná rɨxa xweyaŋí̵ nerɨ aŋí̵ yoí̵ Epesasɨyo nɨŋweámáná payí̵ rɨna eaŋɨnigɨnɨ

3 John

1 Jisasoyá sɨyikí̵ imónɨgí̵áyo wipeŋweaarɨŋáonɨ gí̵ dɨŋí̵ sɨxí̵ rɨyiŋá Gaiasoxɨ nánɨ payí̵ rɨna eaarɨŋɨnɨ. Joxɨ nepa dɨŋí̵ sɨxí̵ rɨyiŋɨnɨ. 2 Gí̵ dɨŋí̵ sɨxí̵ rɨyiŋáoxɨnɨ, Gorɨxomɨ joxɨ nánɨ rɨpɨ yarɨŋí̵ rɨwiiarɨŋárɨnɨ, “O Jisasomɨ píránɨŋí̵ nɨxí̵dɨrɨ nánɨ xegí̵ dɨŋí̵ naŋí̵ imónɨŋí̵pɨ tí̵nɨ xɨxenɨ Gorɨxoxɨnɨyá dɨŋí̵yo dánɨ naŋí̵ imónɨŋí̵pɨnɨ wímearɨ wará inɨrɨ e'wɨnɨgɨnɨ.” yarɨŋí̵ e rɨwiiarɨŋárɨnɨ. 3 Negí̵ nɨrɨxí̵meáyí̵ wí joxɨ nánɨ áwaŋí̵ re nɨre'meáagí̵a, “O nepaxɨŋí̵ imónɨŋí̵pɨ —Jisaso neare'wapɨyiŋí̵pɨ nánɨ rarɨŋɨnɨ. Apɨ nɨxí̵dɨrɨ nerí̵ná yapí̵ bɨ mɨneaiepɨsí apɨ tí̵nɨ xɨxenɨ yarɨnɨ. Nepaxɨŋí̵ imónɨŋí̵pɨ nerí̵ná axí̵pɨ píránɨŋí̵ xí̵darɨnɨ.” Áwaŋí̵ e nɨrarɨŋagí̵a arí̵á nɨwirɨ nánɨ nionɨ yayí̵ seáyɨmɨ dánɨ ninɨŋí̵rɨnɨ. 4 “Dɨxí̵ niaíwí̵ imónɨgí̵áyí̵ xwɨyí̵á nepaxɨŋí̵ imónɨŋí̵pɨ í̵á nɨxɨrɨro xɨxenɨ xí̵darɨŋoɨ.” rarɨŋagí̵a arí̵á nɨwirí̵ná yayí̵ seáyɨmɨ dánɨ ninarɨŋí̵pɨ amɨpí wí nánɨ yayí̵ ninarɨŋí̵pɨ apɨ tí̵nɨ xɨxenɨ mimónɨnɨ.

“Nɨrɨxí̵meáyo arɨrá wiarɨŋí̵pa sɨnɨ axí̵pɨ nɨwia u'ɨrɨxɨnɨ.” urɨŋí̵ nánɨrɨnɨ.

5 Gí̵ dɨŋí̵ sɨxí̵ rɨyiŋáoxɨnɨ, joxɨ negí̵ nɨrɨxí̵meáyo arɨrá nɨwirí̵ná u'rapí bɨ mɨwikárí̵ dɨŋí̵ rɨŋwɨrárɨpaxí̵pɨ wíwapɨyarɨŋí̵rɨnɨ. Nɨrɨxí̵meá joxɨ sɨnɨ sɨŋwí̵ mɨwɨnɨŋí̵ aí xegí̵ bɨ marí̵áɨ, axí̵pɨnɨ wiarɨŋí̵rɨnɨ. 6 Ámá ayí̵ joxɨ dɨŋí̵ sɨxí̵ nuyirɨ arɨrá wiarɨŋí̵pɨ nánɨ Jisasoyá sɨyikí̵ imónɨŋwá re ŋweaŋwae'ne rɨxa áwaŋí̵ nearɨgí̵awixɨnɨ. Joxɨ Gorɨxomɨ píránɨŋí̵ nɨxí̵dɨrí̵ná epaxí̵pɨ tí̵nɨ xɨxenɨ nerɨ óí̵ e nánɨ arɨrá nɨwirɨ nɨwiowárɨrí̵ná yarɨŋí̵pɨ naŋí̵ yarɨŋɨnɨ. 7 Ayí̵ rɨpɨ nánɨ “Arɨrá wíɨrɨxɨnɨ.” rɨrarɨŋɨnɨ. Ámá ayí̵ yoí̵ Jisasɨ Kiraisoyá e'má imónɨgí̵áyo wáí̵ urɨmeanɨro nuróná “Wáí̵ nurɨrane aí wigí̵ amɨpí ourápaneyɨ.” nɨyaiwiro amɨpí bɨ murápí̵ yarɨgí̵á eŋagɨ nánɨ rɨrarɨŋɨnɨ. 8 Ayɨnánɨ Gorɨxomɨ dɨŋí̵ wɨkwí̵roŋwae'ne xwɨyí̵á nepaxɨŋí̵ imónɨŋí̵pɨ nɨrɨga eme'wɨnɨgɨnɨrɨ ayo arɨrá wíwanɨgɨnɨ.

“Sɨpí yarɨgí̵áyo ikanɨŋí̵ mɨwiaxí̵dɨpanɨ.” urɨŋí̵ nánɨrɨnɨ.

9 Nionɨ wáí̵ rɨmearɨgí̵á ayí̵ nánɨ Jisasoyá sɨyikí̵ imónɨgí̵á e ŋweagí̵áyí̵ne' áwaŋí̵ osearɨmɨnɨrɨ nánɨ payí̵ bɨ nearɨ seawí̵re'napí̵agɨ aiwɨ segí̵ ámá wo, Daiotɨrepisoyɨ rɨnɨŋo —O “Nionɨ seáyɨ e wimónɨŋáná wínɨyí̵ ínɨmɨ onurí̵ní̵poyɨ.” wimónarɨŋorɨnɨ. O xwɨyí̵á none urarɨŋwá bɨ arí̵á neaiarɨŋí̵manɨ. 10 Ayɨnánɨ nionɨ seyí̵ne' tí̵ŋí̵ e nánɨ nɨbɨrɨ amɨpí o yarɨŋí̵yí̵ nánɨ waropárí̵ seaimí̵árɨnɨ. O mí̵kí̵ wí meŋagɨ aiwɨ none nánɨ ikayí̵wí̵ rɨmearɨŋí̵rɨnɨ. “E nerí̵ná apánɨ yarɨŋɨnɨ.” mɨyaiwí none rarɨŋwápɨ nɨwiaíkirɨ nɨrɨxí̵meá segí̵ tí̵ámɨnɨ bí̵áyo mumímɨnɨpa yarɨŋí̵rɨnɨ. Wínɨyí̵ wigí̵ aŋí̵yo nánɨ nipemeámɨ wanɨro yarɨŋagí̵a nɨwɨnɨrí̵ná pí̵rí̵ urakiarɨŋí̵rɨnɨ. Apɨnɨ me' e yarɨgí̵áyo Jisasoyá sɨyikí̵ imónɨgí̵áyí̵ne' awí eánarɨgí̵e dánɨ mɨmɨxeámí̵ yarɨŋí̵rɨnɨ. 11 Gí̵ dɨŋí̵ sɨxí̵ rɨyiŋáoxɨnɨ, ámá naŋí̵ yarɨgí̵áyí̵ Gorɨxo tɨmeaŋí̵yí̵nɨŋí̵ imónɨŋoɨ. E nerɨ aí sɨpí yarɨgí̵áyí̵ Gorɨxomɨ sɨnɨ sɨŋwí̵ mí mɨwómɨxɨgí̵áyí̵rɨnɨ. Ayɨnánɨ joxɨ sɨpí imónɨŋí̵pimɨ ikanɨŋí̵ mɨwiaxí̵dɨpa nerɨ naŋí̵pimɨnɨ ikanɨŋí̵ wiaxí̵dí̵ɨrɨxɨnɨ.

12 Demitɨriaso nánɨ ámá ní̵nɨ “Naŋorɨnɨ.” rarɨgí̵orɨnɨ. Xewanɨŋo xwɨyí̵á nepaxɨŋí̵ imónɨŋí̵pɨ nɨxí̵dɨrí̵ná nerɨŋí̵pimɨ dánɨ enɨ “Nionɨ ámá naŋonɨrɨnɨ.” nɨrɨrɨ sɨwánɨŋí̵ neainarɨŋorɨnɨ. None enɨ “Naŋorɨnɨ.” urarɨŋwáorɨnɨ. Xwɨyí̵á none rarɨŋwápɨ nepa imónɨnɨ. Joxɨ nɨjí̵á e imónɨŋagɨ nánɨ rarɨŋɨnɨ.

13 Joxɨ nánɨ “Payí̵ oeámɨnɨ.” nɨyaiwirí̵ná rí̵wamɨŋí̵ obaxí̵ ayá wí eapaxí̵ aiwɨ “Nɨpɨnɨ nɨrɨrɨ payí̵ rɨnamɨ oeámɨnɨ.” mɨnimónarɨnɨ. 14 E nerɨ aiwɨ “Nionɨ sɨnɨ me' nɨbɨrɨ nɨsímeámáná axí̵ e dánɨ xwɨyí̵á rɨnaní̵wírɨnɨ.” nɨyaiwirɨ dɨŋí̵ ikwí̵moŋɨnɨ. Joxɨ píránɨŋí̵ orɨwayɨrónɨnɨ. Nɨkumɨxɨnɨrɨ emearɨŋwáyí̵ re dánɨ yayí̵ seaiwáre'naparɨŋoɨ. Joxɨ tí̵nɨ nɨkumɨxɨnɨrɨ emearɨgí̵áyo e dánɨ womɨnɨ womɨnɨ yayí̵ nɨwie'ra u'ɨrɨxɨnɨ.